Dowladda Federaalka Soomaaliya ayaa si kulul u cambaareysay go’aankii ay Israa’iil ku magacawday wakiil diblomaasiyadeed oo u qaabilsan Somaliland, iyadoo ku tilmaantay tallaabadaas mid si toos ah u jebinaysa madax-bannaanida iyo wadajirkeeda dhuleed.
Warsaxaafadeed rasmi ah oo ay soo saartay Wasaaradda Arrimaha Dibadda Soomaaliya ayaa lagu sheegay in go’aanka Israa’iil uu ka hor imanayo sharciga caalamiga ah, gaar ahaan mabaadi’da ay ku dhisan yihiin Qaramada Midoobay iyo Midowga Afrika, kuwaas oo si cad u aqoonsan Soomaaliya inay tahay hal dal oo mideysan.
Dowladda Soomaaliya waxay mar kale adkaysay mowqifkeeda ah in Somaliland ay weli ka mid tahay dhulkeeda, iyadoo si buuxda u diiday isku day kasta oo lagu doonayo in loogu aqoonsado maamul gooni ah.
Sidoo kale, Muqdisho ayaa ka digtay in tallaabooyinka noocan oo kale ah ay khatar gelin karaan xasilloonida gobolka, isla markaana ay wiiqi karaan dadaallada socda ee lagu xoojinayo dowlad-dhiska, amniga iyo midnimada dalka.
Cambaareyntan ayaa imaneysa kadib markii Israa’iil ay dhowaan magacawday diblomaasi ruug-caddaa ah, Michael Lotem, oo noqday safiir aan fadhigiisu ahayn Hargeysa, taas oo qayb ka ah xiriir sii xoogeysanaya oo u dhexeeya Israa’iil iyo Somaliland.
Ugu dambeyn, Dowladda Federaalka Soomaaliya ayaa ugu baaqday Israa’iil inay dib uga laabato go’aankeeda, waxayna ugu yeertay beesha caalamka, oo ay ku jiraan Jaamacadda Carabta, Ururka Iskaashiga Islaamka iyo Midowga Yurub, inay garab istaagaan midnimada iyo madaxbannaanida Soomaaliya, isla markaana ay ixtiraamaan sharciga caalamiga ah.
