Golaha Mustaqbalka Soomaaliyeed ayaa si buuxda u taageeraya Madaxweynaha Koonfur Galbeed, Cabdicasiis Lafta-gareen, isaga oo qorsheynaya in uu ka dhawaaqo doorashooyinka la filayo magaalada Baydhabo, xilli khilaaf siyaasadeed oo xooggan uu u dhexeeyo Villa Soomaaliya.
Ilo dhow Golaha ayaa sheegay in Lafta-gareen uu ku tala galay in uu ku dhawaaqo qabashada doorasho dadban marka uu gaaro Baydhabo, taas oo muujineysa isbeddel muuqda oo ku yimid jihada siyaasadeed ee maamulka Koonfur Galbeed. Waxaa la rumeysan yahay in Lafta-gareen uu haatan ku sugan yahay dalka Itoobiya, halkaas oo ciidamadu nabad-ilaalin u joogaan Koonfur Galbeed, isla markaana si dhow ula socda dhaq-dhaqaaqiisa.
Dowladda Federaalka Soomaaliya ayaa qaadday tallaabo adag, iyadoo gebi ahaanba joojisay duulimaadyadii tooska ahaa ee tagi jiray deegaannada Koonfur Galbeed. Maanta waxaa sidoo kale hakad lagu sameeyay duulimaadyadii dhowr diyaaradood oo qorshuhu ahaa inay gaaraan Baydhabo.
Tallaabadani waxay sii xoojinaysaa xiisadda siyaasadeed ee u dhexeysa Dowladda Federaalka iyo maamulka Koonfur Galbeed, kaas oo maanta si rasmi ah u hakiyay wada-shaqeyntii uu la lahaa dowladda dhexe. Maamulka Koonfur Galbeed ayaa Dowladda Federaalka ku eedeeyay mas’uuliyadda rabshadaha ka dhacay deegaannadiisa iyo kororka xiisadda siyaasadeed. Waxay sheegeen in dowladda dhexe ay ciidamo geysay deegaanno kala duwan oo ka tirsan Koonfur Galbeed, kuwaas oo loo adeegsanayo hurinta dagaallo ka dhan ah maamulka.
Dhinaca kale, Dowladda Federaalka Soomaaliya, oo qorsheyneysay qabashada doorashooyin toos ah kaddib dhameystirka Dastuurka, ayaa hadda wajahaysa caqabado siyaasadeed oo cusub, maadaama ay sii yaraanayaan maamul-goboleedyada la safan. Horrey Puntland iyo Jubbaland, haatanna Koonfur Galbeed ayaa lumisay taageeradii Villa Soomaaliya, iyagoo si toos ah ugu biiray maamullada diidan qorshaha doorasho ee uu wado Madaxweynaha Soomaaliya, Xasan Sheekh Maxamuud.
Waxaa sidoo kale la filayaa in Galmudug ay qaadato mowqif la mid ah kan Koonfur Galbeed, maadaama aysan weli si buuxda u soo dhoweyn dhameystirka Dastuurka Federaalka, kaas oo jideynaya muddo-kordhin hal sano ah iyo qabashada doorashooyin qof iyo cod ah.
