Golaha Guurtida Somaliland ayaa maanta go’aan muran dhalin kara ku gaaray in muddo kordhin loo sameeyo goleyaasha Wakiillada iyo Deegaanka, iyagoo u kordhiyay 2 sano iyo 3 bilood. Tallaabadan ayaa ka dhigan in xubnihii la doortay 31-kii May 2021 ay sii hayn doonaan kuraastooda muddo ka badan waqtigii loo asteeyay.
Go’aankan ayaa yimid kaddib fadhi rasmi ah oo ay yeesheen xubnaha Golaha Guurtida, waxaana oggolaansho siiyay 72 xildhibaan oo ka mid ah 82 xubnood ee golaha. Guddoomiyaha Golaha Guurtida, Saleebaan Maxamuud Aadan, ayaa ku dhawaaqay natiijada kama dambaysta ah, inkastoo uusan isagu codka ka qeyb qaadan.
Muddo kordhintan ayaa sii xoojisay doodaha ku saabsan dib u dhaca doorashooyinka ee Somaliland, iyadoo ay mar kale dib u dhacday qabashada doorashooyinkii la filayay inay dhacaan waqtigooda. Arrintan ayaa soo jiidatay indhaha bulshada iyo falanqeeyayaasha siyaasadda.
Waxaa xusid mudan in Golaha Guurtida laftiisa uu horay uga gudbay muddadii dastuuriga ahayd ee xilkiisa, isla markaana dhowr jeer uu isagu isku kordhiyay muddo xileedkiisa. Tani waxay dhalisay su’aalo la xiriira sharciyadda, isla xisaabtanka iyo hannaanka dimuqraadiyadeed.
Dhanka kale, tallaabadan cusub ayaa saameyn ku yeelatay sumcaddii nidaamka doorashooyinka ee Somaliland, oo muddo dheer lagu amaani jiray doorashooyin isdaba joog ah oo nabad ah. Dib u dhacyada soo noqnoqday ayaa hoos u dhigay kalsoonidii lagu qabay jadwalka doorashooyinka.
Si kastaba, Madaxweyne Cabdiraxmaan Maxamed Cabdillaahi (Cirro) ayaa hore, xilligii uu mucaaradka ahaa, si weyn ugu dhaliili jiray Muuse Biixi Cabdi dib u dhacyada doorashooyinka. Xaaladda hadda taagan ayaa u muuqata mid isaga iyo xisbigiisa Waddani si toos ah ugu wajahday caqabado la mid ah kuwii uu hore u dhaliili jiray xisbiga Kulmiye.
