Howlgal amni oo ballaaran oo laga fuliyay magaalada Nairobi ayaa daaha ka rogay waxa baarayaashu ku tilmaameen silsilad khatar ah oo ay leedahay kooxda argagixisada, kadib markii la helay tobanaan jawaan oo la tuhunsan yahay inay yihiin dareesyo ciidan oo ay isticmaalaan Al-Shabaab, kuwaas oo lagu qariyay xaafadda Islii.
Howlgalka oo ku salaysnaa xog sirdoon ayaa habeenkii laga fuliyay agagaarka KBS Garage, waxaana hoggaaminayay Ciidanka CID, Unuga la dagaalanka argagixisada iyo ciidanka Booliska.
Guushan ayaa timid kadib dhacdo kale oo 6-dii Abriil ka dhacday Dhobley, halkaas oo ciidamada amniga Jubbaland ay ku qabteen 25 jawaan oo dareesyo la mid ah, taasoo dhalisay tuhun ah in ay jirto shabakad ka shaqeysa xuduudaha labada dal.
Baarayaasha ayaa raadraacay sahaydan, iyagoo ku xiray eedeysane lagu magacaabo Cabdi Xakiim oo hadda ku xiran Dhobley, ka dibna raadku wuxuu gaaray Eastleigh.
Ciidamada ayaa weerar ku qaaday shirkadda Gaani Parcel Express oo ku taalla 12th Street, halkaas oo ay ka heleen 11 jawaan oo midkiiba uu ku jiray 60 darees oo ciidan iyo 120 funaanadood. Sidoo kale, jawaan kale oo ay ku jireen 65 darees iyo 120 funaanadood ayaa laga helay goob u dhow oo la yiraahdo Vision Point Express.
Mas’uuliyiinta ayaa sheegay in maamulaha shirkadda, Cumar Elmi Isaaq, uu si ku meel gaar ah u keydiyay alaabtan kadib markii uu ka guddoomay qof lagu magacaabo Shariif.
Markii baaritaanku sii socday, waxaa la ogaaday silsilad sahay oo ka baxsan Kenya. Shirkad lagu magacaabo Safe Link Cargo oo ku taalla Soma Towers ayaa la rumeysan yahay inay fududeysay soo dejinta 37 jawaan oo kale oo dareesyo ah.
Wararku waxay sheegayaan in alaabtan ay ka timid dalka China, isla markaana ay soo martay dekedda Mombasa iyadoo loo ekeysiiyay xamuul caadi ah.
Shaqaale lagu magacaabo Cabdifataax Aadan Maxamed ayaa lagu tuhunsan yahay inuu ka qeyb qaatay soo dejinta iyo rarista xamuulka, waxaana lala xiriiriyay Shariif iyo eedeysane kale oo lagu magacaabo Cabdulqaadir.
Diiwaanada ayaa muujinaya in alaabta la qaaday 4-tii Abriil, kadibna loo diray Eastleigh, taasoo ugu dambeyn horseeday in la fashiliyo qorshahan.
Dhammaan alaabtii la qabtay ayaa hadda gacanta lagu hayaa, iyadoo dhowr eedeysane ay ku jiraan gacanta Anti-Terrorism Police Unit si ay uga qeyb qaataan baaritaanka.
Hay’adaha amniga ayaa sheegay in howlgalkaan uu yahay guul weyn oo lagu carqaladeeyay sahay argagixiso kahor inta aysan isu beddelin weerarro dhab ah.
