Madaxweynaha Türkiye, Recep Tayyip Erdoğan, ayaa sheegay in dalkiisa uu Soomaaliya ka hirgelinayo xarun hawada sare (Spaceport), isagoo tilmaamay in mashruucan uu qayb ka yahay qorshaha Türkiye ee lagu xoojinayo awooddiisa ku aaddan gaarista hawada sare.
Erdoğan oo khudbad ka jeediyay furitaanka Shirweynaha 77-aad ee Caalamiga ah ee Cir-bixinta (International Astronautical Congress) ayaa sheegay in soo saarista dayax-gacmeedyada oo keliya aysan ku filnayn in dal uu awood ku yeesho hawada sare, balse ay muhiim tahay in uu yeesho awood uu si toos ah ugu gaari karo hawada sare.
“Barnaamijkeenna Qaran ee Hawada Sare waxaan ahmiyad gaar ah siinay yoolka Gaarista Hawada Sare iyo Dhisidda Xarunta Dayax-gacmeedyada (Spaceport),” ayuu yiri Erdoğan.
Madaxweynaha Türkiye ayaa sheegay in, iyadoo la tixgelinayo xaaladda juqraafiyeed ee Türkiye, Ankara ay Soomaaliya u aragto goob istiraatiiji ah oo lagu horumarin karo iskaashi cusub oo dhinaca hawada sare ah.
“Waxaan aasaas u dhigeynaa iskaashi taariikhi ah oo dhinaca hawada sare ah oo aan la yeelanayno Soomaaliya oo ah dal saaxiib iyo walaal ah,” ayuu yiri.
Erdoğan ayaa sidoo kale sheegay in dhismaha xarunta hawada sare ee Soomaaliya la bilaabay, isla markaana Türkiye ay si go’aan leh u sii waddo dadaallada lagu hirgelinayo mashruucan istiraatiijiga ah.
Wuxuu xusay in mashruucu uu Türkiye ka caawin doono kordhinta awooddeeda ku aaddan gaarista hawada sare, iyadoo sidoo kale la filayo inuu gacan ka geysto horumarinta nidaamka iyo deegaanka hawada sare ee qaaradda Afrika.
