Wasiirka Arrimaha Dibadda ee Masar, Badr Abdelatty, ayaa Isniintii kulan la yeeshay dhiggiisa Soomaaliya, Cabdisalaan Cabdi Cali, iyagoo ka wada hadlay xaaladda Soomaaliya, amniga gobolka iyo xoojinta xiriirka labada dal, sida lagu sheegay bayaan ay soo saartay Wasaaradda Arrimaha Dibadda ee Masar.
Kulanka ayaa ka dhacay magaalada Seoul ee Kuuriyada Koonfureed, xilli ay socdeen kulammada wasiirrada ee Madasha Iskaashiga Afrika iyo Kuuriya.
Sida uu sheegay bayaanka, Abdelatty ayaa adkeeyay in Masar ay doonayso inay sii ballaariso iskaashiga kala dhexeeya Soomaaliya, gaar ahaan dhinacyada dhaqaalaha, maalgashiga, ganacsiga iyo amniga. Wuxuu sheegay in xiriirka labada dal uu ku dhisan yahay taariikh dheer iyo danaha istaraatiijiga ah ee ay wadaagaan.
Masar ayaa sidoo kale ku baaqday in la dedejiyo dadaallada lagu sii deynayo badmaaxiin Masaari ah oo lagu afduubtay biyaha ku dhow Soomaaliya, iyadoo carrabka ku adkaysay muhiimadda ay leedahay badqabkooda iyo dib ugu laabashadooda dalkooda.
Bayaanka ayaa muujiyay in Qaahira ay markale taageertay madaxbannaanida, midnimada iyo wadajirka dhuleed ee Soomaaliya. Dowladda Masar ayaa sheegtay inay kasoo horjeeddo tallaabo kasta oo hal dhinac ah oo wax u dhimi karta qaranimada Soomaaliya.
Masar waxay sidoo kale cambaareysay tallaabada maamulka Somaliland uu ku furay xafiis uu ugu yeeray “safaarad” magaalada Qudus, iyadoo ku tilmaantay arrin aan sharci ahayn oo ka hor imaanaysa qawaaniinta caalamiga ah iyo go’aannada khuseeya xaaladda magaaladaas.
Dhanka amniga, Abdelatty ayaa tilmaamay muhiimadda ay leedahay in beesha caalamku sii waddo taageerada howlgalka Midowga Afrika ee Soomaaliya, isagoo ku baaqay in la helo maalgelin ku filan oo waarta si howlgalkaasi u guto waajibaadkiisa.
Wasiirka Arrimaha Dibadda ee Soomaaliya, Cabdisalaan Cabdi Cali, ayaa dhankiisa warbixin ka bixiyay xaaladda amni iyo siyaasadeed ee dalka, iyo dadaallada ay dowladda federaalku ku xoojinayso hay’adaha dowladda iyo la dagaallanka kooxaha hubeysan.
Sida lagu sheegay bayaanka Masar, wasiirka Soomaaliya ayaa uga mahadceliyay Qaahira taageerada ay siiso dalkiisa, isaga oo sheegay in Muqdisho ay danaynayso sii xoojinta iskaashiga labada dhinac.
Kulanka ayaa imanaya xilli Masar ay sanadihii u dambeeyay kordhisay doorkeeda diblomaasiyadeed iyo midka amni ee Soomaaliya, iyadoo labada dal ay yeesheen iskaashi sii xoogeysanaya oo ku saabsan amniga gobolka Geeska Afrika iyo arrimaha Badda Cas.
