Hay’adda Socdaalka iyo Jinsiyadda Mareykanka (USCIS) ayaa 15-kii May soo saartay cusbooneysiin cusub oo la xiriirta xaaladda Magangalyada Ku-meelgaarka ah (TPS) ee muwaadiniinta Soomaaliyeed, taas oo si rasmi ah u caddeyneysa habka loo buuxinayo foomamka shaqada ee Form I-9.
Tilmaamaha cusub ayaa sheegaya in marka la buuxinayo qeybta taariikhda dhicitaanka, loo shaqeeyayaashu ay ku qoraan “as per court order” qeybta koowaad, halka qeybta labaad lagu qorayo July 1, 2026, iyadoo faahfaahin dheeraad ah lagu darayo sanduuqa Additional Information.
Go’aankan ayaa wax ka beddelaya tilmaamo hore oo ku saabsanaa kordhinta rukhsadaha shaqada ee dadka heysta TPS, waxaana hadda la mideeyay dhammaan taariikhihii ku-meelgaarka ahaa, si dhammaan rukhsadahaasi ugu ekaadaan 1-da July 2026.
Dhanka kale, 1-dii May maxkamad ku taalla Mareykanka ayaa kordhisay hakinta go’aan hore, iyadoo la sugayo xukunka kama dambaysta ah ee Maxkamadda Sare ee Mareykanka ee la xiriira kiisaska TPS ee dalalka Suuriya iyo Haiti.
Khubarada arrimaha socdaalka ayaa sheegaya in go’aanka kasoo baxa kiisaskan uu saameyn ballaaran ku yeelan karo mustaqbalka barnaamijka TPS guud ahaan, maadaama uu dejin karo jihada sharci ee lagu maamuli doono dalalka kale ee ku jira barnaamijkan, oo ay Soomaaliya ku jirto.
Loo shaqeeyayaasha iyo dadka ka faa’iideysta TPS-ka ayaa lagu booriyay inay si dhow ula socdaan dacwadaha socda, maadaama isbeddel kasta oo sharci uu iman karo digniin kooban gudaheed.
